第四回#

1#

各位點傳師，各位同仁，承蒙天恩師德，前人的慈悲，各位組長與及各位點傳師的成全，後學奉黃點師之命，今晚有個寶貴機會上來學習一課，基於道大理微，後學對道義認識膚淺，一息間學習中有不圓滿的地方，懇請黃點師慈悲補充完滿，各位同仁原諒。

奉黃點師之命，後學今日繼續和大家一同學習《韓湘子全傳》這本書。今日是第四回。

2#

上回講到，湘子迎娶才貌雙全的蘆英小姐，三朝過後，滿月之期，蘆英小姐照規矩返娘家，竟就冇番回韓家，佢嬸娘竇氏蛾咗湘子一輪，佢就只好乖乖聽話去去探望蘆英，帶佢番屋企。

幾個月之後，韓退之科舉高中後，仕途好順，幾年間就已經升遷至刑部侍郎，所以就接埋竇氏、湘子、蘆英一起到長安定居。

3#

話說有日韓退之，退咗朝返歸，路過一條灑金橋。望見橋東橋西竟然坐咗兩個奇人異士。

橋東嗰個，生得八面威風，虎背熊腰，滿面虯髯！睇佢落力大如牛，話佢係張飛或者伍子胥再世都有人信！

橋西嗰個呢，就斯文得多喇！眉清目秀，粉面硃唇，文質彬彬。睇落仲有啲似諸葛孔明咁！

韓退之心諗兩位定係世外高人，於是拱手問道：「敢問呢位先生，仙鄉何處？因乜解究要出家修道呢？」

嗰位道人微微一笑：「老夫同大人您，係『同輩不同朝』。大人您係大唐嘅刑部侍郎，老夫就係大漢嘅一員大將。但係我朝（漢）君主殘害三位忠良！三齊王韓信、大梁王彭越、九江王英布，都係我朝三大名將，馬上打天下，幫漢高祖打下大好江山，點知最後死得連豬狗都不如！貧道睇化晒，辭官唔做，隱姓埋名，遠走終南山，跟東華帝君學道成仙（「陽氣之精」與西華至妙之氣化生的「西華金母（王母娘娘）相對應。老夫乃係大漢鍾離權係也，祖籍河間府任丘縣。」

（231-196 》》768-824）

「咁橋西呢位先生又係邊度人氏？同鍾離先生係咪同一輩人呀？」

嗰位後生道人開聲喇：「貧道乃係本朝嘅讀書人，祖籍河中府夏縣。自細讀過幾行書，亦上京赴過考。後來有緣撞到鍾離師父幾次點化我，我都唔肯死心。點知佢將一張蘆席化作一座地獄，入面有十殿閻君，將我靈性收入葫蘆入面！我一覺醒來，先明白到『做官做唔到頭，發達發唔得耐』嘅道理。於是棄儒修道，終成正果，我就是**『兩口先生』**（呂字兩個口）！」

韓退知聽完就知真係遇到高人，當即請兩位先生到府，食餐齋飯。

韓老爺同兩位仙師返到屋企，韓湘子見到兩位仙師，就好有禮貌咁作咗個揖。

鍾離師父一望，眉頭一皺：「呢位係⋯⋯？睇佢相貌，應該係剋父母嘅命喎。」

韓老爺一聽，心入面「咯噔」一聲，應道：「呢個係小兒。」

鍾離師父連忙改口：「哎呀，原來係公子，咁係貧道失言喇。」

韓老爺嘆口氣話：「唉，佢其實係我姪仔，叫韓湘子。佢早年父母相亡，一直都係由我撫養長大。」

呂師父聽完，湊埋去仔細一睇，隨即呵呵大笑：「呢個細路唔簡單！佢有『三朝天子分，七輩狀元才』。如果唔係全家一齊享盡榮華，就肯定係九族一齊飛升成仙！大人，您根本唔使愁佢富貴唔富貴！」

「不過有一樣，呢個細路而家行緊『墓庫運』，做嘢容易巔巔倒倒、失魂落魄，要到十六歲先至脫運。大人您最好搵位好師傅，時時刻刻提點下佢，免得佢行錯路呀！」

韓老爺其實都正有此意，於是乘機請教：「請問兩位先生，乜嘢叫做『天』呀？」

4#

鍾離師父答：「牛有兩隻角，馬有四隻蹄，自然而然，呢啲就係『天』。」

韓老爺又問：「咁乜嘢叫做『人』呀？」

呂師父接住講：「穿牛鼻，絡馬腹，用規矩去約束，呢啲就係『人』。如果我地唔用人為嘅嘢去破壞天然，唔因為世俗嘅原因去改變天命，守住呢份本真，就係『合其真』喇。」

鍾離師父此時又反問一句：「大人，天地人叫三才。點解天地可以咁長久？但人喺天地之間，點解有啲好似彭祖咁長命，有啲好似顏回咁短命？仲有啲細細個就夭折？呢啲壽夭不齊，到底係為乜呢？」

韓老爺呢次真係被考起喇，沉吟咗半日，又答唔出。

呂師父笑笑口話：「其實人人都可以同天地一樣長命，只係世人自己參唔透啫！」

接住落嚟，三個人你一言我一語，又討論起「道心」同「人心」嚟。

5#

韓退之一開場就問啲深奧嘢，佢話：「當年舜帝傳位畀大禹，講過『人心惟危，道心惟微』，我想請教，人可唔可以唔要『人心』呀？」

呂師微微一笑，答得妙喇：「劍閣路雖險，夜行人更多。」 呢句係話：名利場就好似劍閣蜀道咁險峻，但哪怕係黑媽媽嘅半夜，趕路追名逐利嘅人依然係咁多！人心難測，世人又點捨得放下呢？

6#

韓老爺又追問：「咁『道心』呢？係咪一定要追求清淨嘅道心？」

呂師又話：「金屑雖珍貴，著眼亦為病。」 即係話：金粉雖然值錢，但如果捽咗入眼，一樣會搞到你眼痛！修道如果太過執著「道心」，反而變咗負擔，阻住你見性！好多人以為修行、追求道心，一定要好用力、好「有為」咁去鑽研。道家講「無為」唔係「唔做嘢」，而係「唔亂做」，係指唔好加插太多個人嘅偏見、執著同埋慾望入去。您越係想「有為」地去修，嗰粒「求道之心」反而變咗您對眼入面嘅金粉，搞到您睇唔清個世界。

7#

韓老爺聽完，開始搲頭喇：「咁我『無心之中帶點有心』呢？」

鍾師就回佢：「曾被雪霜苦，楊花落也驚。」 呢句即係話：如果你心入面仲有種恐懼或者成見，就好似被霜雪凍過嘅人，見到楊花飄落都以為係落雪，嚇到震晒。你心入面仲有「驚」，就唔係真正嘅自在。

8#

韓老爺再換個方向問：「咁我『有心之中帶點無心』又點呀？」

鍾師搖搖頭：「不勞懸占鏡，天曉自雞鳴。」 不勞懸占鏡係指，唔洗掛面鏡嚟占卜。天一光，雞自然會啼。我哋使唔使去幫隻雞啼呀？使唔使去推個太陽出嚟呀？唔使！順其自然就係喇，諗太多「有心定無心」，其實反而係落咗兩邊！

9#

韓老爺仲想試吓佢哋：「咁係咪話『有心』就全盤皆錯呢？」

呂師道嘆口氣：「不得春風花不開，花開又被風吹落。」 好似啲花咁，無春風佢唔開，但開咗之後，一陣風吹埋嚟又謝。世間事有生就有滅，你太過刻意去「有心」經營，到頭來都係一場空。

10#

韓老爺最後問：「咁係咪『無心』就最最高明、最美妙呀？」

鍾師父哈哈大笑：「曙色未分人盡望，及乎天曉也尋常。」 天未光嗰陣，個個都抬頭望，覺得天亮好神聖、好期待；等真係天大亮喇，大家又覺得平平無奇。你追求嗰種「無心」嘅境界，未得到嗰陣覺得妙，得到咗其實都係咁普通。

呢句「及乎天曉也尋常」其實好值得參詳。好多人可能會聽到「道」會以為係啲好神奇、好玄、好術流動靜嘅嘢。但鍾師父話：天光之後，咪又係咁樣？「無為」嘅最高境界，就係將最深奧嘅道理，過成最平常嘅日子。

呢場對話，表面講道理，其實亦都係兩位仙人喺度「點醒」韓老爺：修道唔係靠把口講，亦唔係靠執著，要明，但又唔可以執著於明同埋定義嗰度。呢六對看似簡單嘅應對，可算係道家「無為」一個好好的教學。

11#

韓老爺見呢兩位先生滿腹經綸，見解獨到，心諗：總算搵到高人槷教我個姪仔喇！

咁佢就話：「我屋企有座睡虎山，入面起咗座九宮八卦團瓢（茅屋），清幽瀟灑。我想請兩位留低，教舍姪習文習武。如果佢學得成文武藝，報效朝廷，我心願就了喇！唔知兩位意下如何呢？」

兩位仙師謙虛話：「我哋係山野村夫，無乜大本事。既然大人睇得起，我哋梗係盡心教導。不過大人您要始終如一，唔好聽人講兩句讒言就怪罪我哋呀。」

韓老爺大喜，即刻安排素齋款待，隨後叫下人張千、李萬帶兩位仙師去團瓢住低，仲千叮萬囑韓湘子要勤力讀書，光宗耀祖。

故事先講到呢度，因為時間嘅關係已經差唔多到時間啦。今日呢一回又有啲咩啟發呢？

12#

• 功名利祿皆是鏡花水月

  • 韓退之科舉高中，仕途好順，做到刑部侍郎
  • 但鍾仙以自身經歷作法：他曾是大漢名將，立下赫赫戰功，但最終看見韓信等三賢「死得不如豬狗」，才驚覺為官、為富皆不能長久。這啟發修道人，若不能看破「功名」這層虛幻，就無法跳出輪迴與權力的漩渦。

• 修行在於「合其真」，而非「人為」

  • 韓退之同好多父母一樣，好想去栽培湘子
  • 但呂仙解釋天與人的分別：牛角馬蹄是「天」（自然），穿鼻絡腹是「人」（人為）。真正的修道不是要增加什麼玄妙的法術，而是「不以人滅天」，即不要用後天的慾望、規矩去損害先天的本真。這與《道德根源》相通：修行是做減法，減去偽裝與執著，回歸自然。

• 破除對「道」的執著（無心與有心）

  • 這是全篇最精彩的機鋒。韓愈不斷糾結於「應該有心修行」還是「無心修行」。仙師的回答都在強調：一旦你「想」去修，就已經是執著。
  • 「金屑著眼亦為病」：即使是再好的佛法道理，如果你死守不放，它也會變成傷害你心性的障礙。
  • 修行不應追求神異，而是要達到「天曉也尋常」的境界——將大道融入平淡的生活中，不再覺得修行是一件「特殊」的事。

• 因緣與提撕（指導，典故出自《詩經·大雅·玄抑》的「言提其耳」以及鄭注「親提撕其耳」）的重要性

  • 故事中提到韓湘子雖然有「七輩狀元才」，但若無好師傅「提撕警覺」，亦可能錯走路頭。這說明修道雖然靠個人領悟，但在關鍵的轉折點（如韓湘子的十六歲運程），前輩的指引（傳承與師法，我們的一指點）能幫助修行者避開魔障與迷途。

總結#

《韓湘子全傳》第四回告訴修道人：「放下的勇氣」與「回歸自然的定力」。修行不是為了得到「奇蹟」，而是為了在看清世間殘酷與無常後，依然能擁有一份「雞鳴天曉」般的平常心。

好啦，今晚我們在這一課，學習了《韓湘子全傳》的第四回⋯⋯嘅前半集！

咁欲知後事如何，且聽下回分解。

後學今日學習到呢到。

基於道大理微，後學學習中有不圓滿的地方，懇請黃點師慈悲補充圓滿指正，各位同仁多多原諒！